عصرة الندرة
فى الجو .. ريحة عفن
أكوام زبالة ف كافة الأركان
فوق كل رصفان الوطن .. احزان
فى طرقة المستشفى والدكان
وف توصيات اللجان
الكدب تاقن لهجة التحريف
وبقايا إنسان ممزع جنب كل رصيف
الصدق أصبح رزالة .. والأمل تخاريف
الدنيا أشبه ما تكون بكنيف
سراميك مدهب مشجر متقن التزييف
لايق بيسرا وشهقتها عمر يا شريف
الورد ميت خفيف والشجر عريان
الموت أليف والقتل ما بقاش مخيف
*
وحياة أبوك قبل ما تقرف تبهدلنى
وباللى ما قصدتوش تقولنى
قوم دلنى على نص شبر نضيف
سمعنى .. صرخة برئ أو قول جرئ طاهر
واقع أنا ف عرضك
اذا لسه فيه فى الذاكرة مواويل
قليل من الشعر عن معنى ربيع وخريف
شممنى لو باقى حتة من تراب أرضك
ياما نفسى استطعم روايح الريف
الاستجابة بقت حالة .. وسمه ..
عاصيه على التأليف
وأنا من صغر سنى عارفك
بصمتى وبشعرى قارفك
وانت قلبك خفيف
.. الاحتمال والرضا أسهل
بدون تكاليف
عذرك معاك يا عم فوتها
ما فيش تكليف
القدرة ما يقدر عليها اليوم
سوى قادر
أو بورمجى فاجر
والندرة إنك تكون
وسط السفالة .. عفيف
من ديوان : سايق عليك الوطن
